2024 жылғы 27 қарашада Құрманғазы атындағы Қазақ ұлттық консерваториясының 80 жылдығына арналған және ҚР Ұлттық кітапханасы мен Құрманғазы атындағы Қазақ ұлттық консерваториясы бірлесіп ұйымдастырған «Қазақ өнерінің қара шаңырағы» кітап-экспозициялық көрмесінің ашылуы, сондай-ақ ҚҰК профессорлық-оқытушылар құрамы еңбектерінің тұсаукесері өтті.

Көрменің мақсаты – оқырмандарды Құрманғазы атындағы Қазақ ұлттық консерваториясының тарихымен және заманауи дамуымен таныстыру.

Кештің модераторы  –  Мәдениет саласының үздігі, Шалқар радиосының журналисі Гүлмира Нәлібай. 

Іс-шараны ҚР Ұлттық кітапханасының директоры, Қазақстандық Кітапханалық Одақ төрағасы, «Құрмет» орденінің иегері Оспанова Бақытжамал Қайырбекқызы құттықтау сөзбен ашты.

Сондай-ақ, философия ғылымдарының докторы (PhD), дарынды пианист, концертмейстер, халықаралық байқаулардың лауреаты, Құрманғазы атындағы Қазақ ұлттық консерваториясының ректоры Тасбергенова Гаухар Қошқарбекқызы сөз сөйледі.

ҚР Ұлттық кітапханасына кітаптар және консерваторияның профессорлық-оқытушылар құрамының еңбектері сыйға тартылды.

Фойеде Ахмет Жұбанов пен Ғазиза Жұбанованың Мемориалдық үйінен олардың наградалары, медальдары, А. Жұбановтың жеке домбырасы, киімдері және фотостендтері, Құддыс Қожамияров атындағы республикалық мемлекеттік академиялық ұйғыр музыкалық комедия театрынынан алып келген Қ. Қожамияровтың костюмі орналастырылды.

Ұлттық кітапхана фойесінде «Қазақ өнерінің қара шаңырағы» атты безендірілген кітап көрмесі ұйымдастырылды. Көрме Құрманғазы атындағы Қазақ ұлттық консерваториясының ректорлары: Е. Круглыхин, А. Жұбанов, Қ. Қожамияров, Е. Рахмадиев, Ғ. Жұбанова, Д. Қасейінов, Ж. Әубәкірова, А. Жүдебаев, Г. Тасбергенованың шығармаларын таныстырудан басталды.

Көрмеде Ұлттық кітапхана қорында сақталған кітаптар, мерзімді басылымдар, нота материалдары, компьютерлік дискілер, күйтабақтар және Құрманғазы атындағы Қазақ ұлттық консерваториясы Ғылыми-ақпараттық кітапханасының қорындағы  сирек кездесетін қолжазбалар мен ноталық басылымдар,  сондай-ақ, консерватория шығаратын "Saryn" халықаралық журналы ұсынылды. Қатысушыларды кітап көрмесімен ҚР Ұлттық кітапханасының қызметкерлері Қанат Алтынбек пен Ертай Біләл таныстырды.

Н. Дәулетова атындағы залда  Құрманғазы атындағы ҚҰК  профессорлық-оқытушылар құрамы жариялаған жұмыстардың тұсаукесері өтті. Модераторы - «Музыкатану және композиция» кафедрасының аға оқытушысы, өнертану ғылымдарының магистрі Түлкібаева Жұлдыз Жаханшақызы.

Іс-шараға: танымал музыканттар, Қазақстанның әншілері, консерватория басшылары, оқытушылары мен студенттері, музыкалық колледждер мен мектептердің оқушылары, кітапхана оқырмандары, БАҚ өкілдері қатысты.