2024 жылғы 22 қарашада ҚР Ұлттық кітапханасының Н. Дәулетова атындағы залында ұлағатты ұстаз, көрнекті әдебиеттанушы-ғалым, филология ғылымдарының докторы, профессор Темірхан Тебегеновтің туғанына 75 жыл толуына орай еске алу мақсатында «Профессор Темірхан Тебегенов және қазақ әдебиеті эпикасының өзекті мәселелері» атты халықаралық ғылыми-тәжірибелік конференциясы өтті.

Кешті белгілі әдебиеттанушы-ғалым, филология ғылымдарының докторы, профессор, ҚР Еңбек сіңірген қайраткері Нұрдәулет Ақыш жүргізді.

Ғалымға арналған кітап көрмесімен кеш қонақтары танысып, Т. Тебегенов туралы ақпараттық-танымдық бейнебаяндар көпшілік назарына ұсынылды.

Профессор Т. Тебегенов туралы ыстық естеліктерімен қоса халықаралық конференцияның өтуімен құттықтап бейнетаспа жібергендер қатарында Татарстан, Башқұрстан, Өзбекстан, Қырғызстан Республикаларының ғалымдары мен зиялы қауым өкілдері болды.

Онлайн түрде айтыскер ақын, Қорқыт Ата университетінің аға оқытушысы, ҚР мәдениет саласының үздігі, Серік Ыдырысов ұстазға арналған өз шығармашылығынан шашу шашты.

Әл-Фараби атындағы Қазақ Ұлттық университеті, Абай ғылыми зерттеу институтының директоры, филология ғылымдарының докторы, Қазақстанның еңбек сіңірген қайраткері Жанғара Дәдебаев, Қырғызстан Республикасы И. Арабаев атындағы университетінің профессоры, педагогика ғылымдарының докторы Қиялбек Ақматов, Абай атындағы Қазақ Ұлттық университетінің профессоры, филология ғылымдарының докторыАлуа Таңжарықова, ҰҒА академигі Ханкелді Әбжанов, БҰҰ Адам құқығы жөніндегі комитетінің кеңесшісі, Қазақстан Жазушылар одағының мүшесі, ақын, экономика ғылымының докторы, профессор Әбен Нұрманов, Астана қаласындағы Шәкәрім атындағы №56 мектеп-лицейінің қазақ тілі мен әдебиеті пәнінің мұғалімі, филология ғылымдарының кандидаты, педагог-шебер Шамахова Ақманат Ыбырайқызы сынды ғалымдар Темірхан Тебегеновтың әдебиеттануғы орны туралы баяндамалар оқыды.

Конференция барысында профессор Темірхан Тебегеновтың шығармашылығынан құрастырылған 22 кітаптан тұратын көптомдық шығармалар жинағының тұсауы кесілді.

№159 гимназиясы Т. Тебегеновтың өмірінен үзінді келтіре отырып, көрініс ұйымдастырды.

Сонымен қатар сөз сөйлегендер қатарында «Балдырған» журналының бас редакторы Ерғали Бақаш, Қыздар педагогикалық университетінің профессоры, ф.ғ.д. Руда Зайкенова, ЕҰУ «Қазақ тілі мен әдебиеті педагогтерін даярлау» білім беру бағдарламасының 2-курс докторанты Ахмадиева Дана, Қызылорда облысы, Қармақшы ауданы, Ақжар ауылы, 28 орта мектебінің қазақ тілі мен әдебиеті пәні мұғалімі Оңалбаева Жанат, шәкірті, педагогика ғылымдарының магистрі, докторант, Ыбырай Алтынсарин атындағы №159 гимназияның қазақ тілі мен әдебиеті пәнінің мұғалімі Анапияева Салтанат болды.

Конференция соңында қорытынды сөзді қызы, филология ғылымдарының кандидаты Алтынарай Тебегенова сөйледі.