2024 жылғы 21-23 қазан аралығында ҚР Ұлттық кітапханасының Консервация, қалпына келтіру және түптеу қызметінің реставраторы Смағұлова Мақпал М.И.Рудомино атындағы Бүкілресейлік мемлекеттік шетел әдебиеті кітапханасы ұйымдастырған «Өткенді сақтау –болашақты құру» атты құжаттамалық мұраны сақтау саласындағы жас мамандардың кәсіби шеберлігінің III конкурсына қатысты.

Байқау жас таланттарды анықтап, олардың жазба мұраны сақтау саласындағы кәсіби өсуіне ықпал етеді.

Бірнеше ай бойы қатысушылар конкурстық тапсырмаларды орындады.

ҚР Ұлттық кітапханасының Консервация, қалпына келтіру және түптеу қызметінің маманы М.Смағұлова финалға шықты.

Қызмет жетекшісі Шоманова Аида Мұратқызы конкурстық комиссияның мүшесі болды.

Екі күн ішінде қатысушылар бірқатар тапсырмаларды орындады: реставрациялық және қосалқы материалдың түрлерін анықтау, сия бояуының түрін анықтау, түпнұсқаның түсіне сәйкес зақымдануларды бояу (тонирование), қалпына келтіру үстелінде «түйісу», «қабаттасу»және «қағаз массасымен қолмен толтыру»әдістерімен зақымдануларды толықтыру; реставрациялауға жататын құжатты қайталау(дублирование), үлгі бойынша және авторлық тәсілмен клейстер қағазын жасау, терезесі бар паспартуға гравюраны монтаждау.

Байқау қорытындысы бойынша М. Смағұлова «Жазба мұраны сақтауға қосқан үлесі үшін»арнайы дипломымен марапатталып, оған қатысушы сертификаты табыс етілді.

Байқауға Ресей Федерациясы мен Беларусь Республикасының кітапханалары, мұражайлары мен мұрағаттарының жас мамандары, сондай-ақ Ресейдің көркемсурет жоғары және орта оқу орындарының студенттері қатысты.