2024 жылғы 15 қазанда ҚР Ұлттық кітапханасының Н. Дәулетова атындағы залында «ИСЛАМ ЭНЦИКЛОПЕДИЯСЫ» ЖӘНЕ «ДІН МЕН ДӘСТҮР 3» кітаптарының таныстырылымы өтті.

Шараның модераторы ҚМДБ жанындағы Ислам ғылыми-зерттеу институтының директоры, белгілі ғалым, филология ғылымдарының кандидаты, доцент Төрәлі Қыдыр.

Кітаптың таныстырылымында бабалар рухына Құран оқылып, «Мүфтият баспасының өнімдері – дін мен дәстүр діңгегі» бейнеролигі көрсетілді.

Шараны Қазақстан мұсылмандары Діни басқармасының төрағасы, Бас мүфти Наурызбай қажы Тағанұлы кіріспе сөзбен ашты. Сондай-ақ, ҚР Мәдениет және ақпарат министрлігі Дін істері комитетінің төрағасы Нүкежанов Ержан Болатқанұлы барша жиналған қауымды кітаптардың таныстырылымымен құттықтап, олардың маңыздылығына тоқталды.

Іс-шара аясында Қазақстан халық жазушысы, кинодраматург, ҚМДБ Ақсақалдар алқасының мүшесі Смағұл Абатұлы Елубай; доктор, профессор. IRCICA Ислам ынтымақтастығы ұйымы жанындағы Ислам тарихын, өнерін, мәдениетін зерттеу орталығы Бас директорының Орталық Азия зерттеулерін ұйымдастырушылық қызметі бойынша кеңесшісі Мүминов Әшірбек Құрбанұлы; «Нұр-Мүбарак» Египет ислам мәдениеті университетінің ректоры, профессор Ахмад Хусейн Мухаммад Ибраһим; профессор, философия ғылымдарының докторы, Әл-Фараби атындағы Қазақ ұлттық университетінің профессоры Жақыпбек Алтайұлы Алтаев; Әл-Фараби атындағы ҚазҰУ Шығыстану факультетінің профессоры, ф.ғ.д. Баян Нұрсұлтанқызы Жұбатова; ҚР Президентінің жанындағы ҚР ҰҒА, Білім және қоғамды дамыту ғылымдары орталығының басшысы, PhD Жеңісбек Мұратбекұлы Төлен және т.б. «Ислам энциклопедиясы» және «Дін мен дәстүр 3» кітаптарына өз пікірлерін білдіріп, жылы лебіздерін жеткізді.

Қатысушылар: имамдар, ақын-жазушылар, студенттер, кітапхана қызметкерлері мен оқырмандары және БАҚ өкілдері.